Imarsiornermik Nakkutilliisoqarfiup akisussaaffigilernissaa pilersaarutaanngilaq

Naalakkersuisut Imarsiornermik Nakkutilliisoqarfiup qinersivimmi 2018-2022-mi akisussaaffigilernissaanut pilersaaruteqanngillat, Naalakkersuisut akissuteqarput. Naalakkersueqatigiit isumaqatigiissutaanni taamaallaat Inuussutissalerinermut Nakkutilliisoqarfik tiguneqartussatut eqqaaneqarpoq.

Inatsisartunut ilaasortaq Jens Napâtõk’ § 37 aqqutigalugu Naalakkersuisunut apeqquteqarpoq, Naalakkersuisut ukiuni 2018-2022 Imarsiornermik Nakkutilliisoqarfiup Kalaallit Nunaannut nuunneqarnissaanik sulissuteqarnialernersut.

– Imarsiornermik Nakkutilliisoqarfik Kalaallit Nunaannut nuunneqassappat, suut nuunneqarnissaanut sinaakkutissat pisariaqartinneqarpat, Napâtõk’ aperivoq.

– Akisussaaffimmik nuussinissamut Naalakkersuisut pilersaaruteqanngillat, aamma nuussisoqassappat sulisut 15 – 19-it atorfissaqartinneqassapput, tamannalu 25-30 millionit koruuninik akeqartussatut missingersorneqarsimavoq, Naalakkersuisut akissummi allapput.

Naalakkersuisut akissutaanni tunngavigineqartoq tassaavoq, Nakkutilliisoqarfiup massakkutut Danmarkimi aaqqissuunneqarsimaneratut isikkoqartillugu nuunneqassappat, qanoq inissisimasoqassanersoq.

Aaqqissuisut

Nunarput pillugu sammisaqarfik