IMAK: Meeqqat ikiorserneqartarnerat unamminarpoq

Meeqqat atuartinneqarnissaanut periarfissat illoqarfimmiikkuit nunaqarfimmiikkuilluunniit assigiissapput, aamma akunnerit ilinniartitsinermut atorneqartut eqqarsaatigalugit, minnerunngitsumillu ikiorneqartarnissamut periarfissiissutit ilanngullugit.

Taamak IMAK-mi siulittaasoq, Birthe Møller Therkildsen, ICC-p ilinniartitaaneq pillugu Nuummi sapaatip-akunnera kingullermi ataatsimiititsinerani oqarpoq.

– Kattuffiup tamanna anguniagaraa, kisianni sumiiffinni atugassaritinneqartut assigiinngitsorujussuupput. Ilaat amigaateqanngillat, ilaalli ilinniartitsinissamut pisariaqartitaminnik suuteqanngingajavittarput, Birthe Møller Therkildsen oqarpoq.

Ilanngulluguttaaq oqalugiarnermini oqaatigaa, meeqqat ajornartorsiuteqartut ikiorserniarneqartarnerat unammillernartartoq.

– Timikkut misigissutsitigulluunniit innarlerneqarsimaguit, ikiorneqartariaqartutullu nalunaarneqarsimaguit, piffissarujussuaq ingerlasinnaasarpoq. Naallu avinngarusimasuni ilinniartitsisut nukippassuit atorlugit meeqqanut ilinniartitsiniaraluartut, suliassaminnik naammaginartumik naammassisaqarnissaminnut sakkussaqanngillat, Birthe Møller Therkildsen oqarpoq, nangillunilu:

– Avinngarusimasumi najugaqaruit, meeqqallu atuarfiat naammassissagukku, taava illoqarfimmut nutsertariaqassaatit. Tamannalu qaavatigut ajornartorsiutaavoq, tassami ikiorneqarnerup ingerlatiinnarneqarnissaa kipitinneqarsinnaavoq, taamalu angusarlunnermik kinguneqartitsisinnaalluni, IMAK-ip siulittaasua oqarpoq.

Aaqqissuisut

Nunarput pillugu sammisaqarfik

%d bloggers like this: