Ilumut marluk pisariaqarpat

AAQQISSUISUT. Soorlumiuna Namminersorlutik Oqartussat aqutsiffiini pilersaarutit piviusunngortinneqannginnissaat tunaartarineqartartoq. Immaqa tamanna atorfilittat tunngavilersuisinneqartartut maani nunaqartuunnginnerannik pissuteqarpoq. Politikerimmi suliassamik aallartitsisimasut ilimasunnerannut uniuisarnerat takornartaanngeqaaq. Tamakkulu tamarmik annertuumik kinguarsaanernik malitseqartarput.

Mittarfiliornissanut tunngatillugu ukiuni kingullerni 30-ni aporfilersuisoqartarsimaqaaq, tamannalu ineriartortoqarnissaanik pimoorussinnginnermik ilanngulluni takutitseqataasut ilagaat. Tunngaviusumik politikikkut isumaqatigiinngitsoqanngikkaluartoq, piareersaassutigineqarsimallutik tunngavilersuutigineqartartut annermik saqissaassutaasarsimapput.

Kangerlussuaq, Narsarsuaq, Nuuk minnerunngitsumillu Qaqortoq pillugit misissuinerpassuit qularnanngitsumik mittarfiup ataatsip akianik nalillit ingerlanneqartarsimapput. Tamarmillu maannamut annermik siunnersortinit avataaneersunit suliarineqartarsimapput , aamma qularnanngilaq atorfilittat ataatsimiigiarlutik nunaminnut angerlarallartarnissaanut pissutissaqarluartitsisarsimassapput.

Kingullertigut aalajangiussassatut Inatsisartunut saqqummiunneqartut marlussunnik, maannalu pilersaarutinik unitsitsisinnaasunik, paasissaanngitsortaqarput.

Siullertut Nuummi Ilulissanilu takissutsit (2.200 meterit piumasaqaatitigullu malitsigisaat). Soorunami politikerit aalajangiiniaraluartussat akornanni sukkasuumik tamanna apeqqusersorneqalerpoq, pingaartumik aatsaat qinerneqarsimasut akornanni; Naannerulaartunik, immaqalu akikinnerulaartunik, aallaqqaammut sanaartoraluaraanni suna ajussagami? Pisariaqanngilaq aallaqqaamut suna tamaat kuultilersunngikkaluarlugu pigutta? Taamaakkamilu Nuummi aamma Ilulissani 1.800 meterit periarfissatut eqqartorneqalerput. Kingullertigullu Kalaallit Airportsip suli atuuffissaqarumalluni neqitsersuilluni aallartippoq; 1.800 meterinut siunnersuut politikerinut miloriuppaat.

Aappaattut nunatsinni 56.000-nik inoqarfiusumi sooq ingerlatsiviit marluk atorlugit mittarfiit ingerlanneqassappat? Ilulissat aamma Nuup mittarfii qanoq allaanerutigigamik immikkut ingerlatsiviliorneqartariaqarpat? Taamaappat sooq Kangerlussuaq aamma Narsarsuaq qangali immikkut ingerlanneqarsimanngillat?

Atorfilittat piareersaasiornerminni nammineq allapput, marlunnik ingerlatsiviliornikkut neriuutigigitsik pisortat mittarfeqarfinnik ingerlatsinerat unitsinneqarsinnaassasoq. Taamaassimapput soormi ingerlatsivik ataaseq, pisortat avataani inissisimasussaq, aalajangiutiinnarneqanngila? Aamma politikerinut uppertitsissutigineqarpat A/S-lioraanni pisortat piginnittuujunnaartartut, taava sooq A/S-nik pilersitsiortorneq taamak annertutigisumik pisortat akornanni ingerlanneqassava?

Taamaattumik mittarfiit pineqartut piviusunngortinneqassappata naaperiaataasinnaasunik pisariaqartitsisoqarpoq. Kalaallit Airportsip suliassaanut tunngassuteqartut aamma takissutsit inissillugit naammassineqarsinnaappata, qularnanngilaq suliassaq ajornannginnerusumik ingerlaqqissinnaassaaq.

Tassanilu Inatsisartunut ilaasortat atorfilittanit naalakkersuisunillu akornusersorneqaratik suliassap sumut sammiveqartinneqarnissaanik aalajangiinissaat pisariaqarpoq – tunngavilersuutigineqarsinnaasut sippulimmik pigineqareerput . Taamaanngippat ukiorpassuarni utaqqeqqinnissaq marriffigineqaqqissaaq.