Ilisimatusarfik paasissaanngitsoq

Ilisimatusarfimmi ph.d.-tut suliaqarsimanermut atatillugu marsip 21-ani tamanut ammasumik saqqummiussisoqartussaasoq Ilisimatusarfik nalunaaruteqarpoq.

Soqutiginnikkaluarlutik apeqquteqartut akissutisisimapput, saqqummiussineq taamaallaat qallunaatut ingerlanneqassasoq aamma kalaallisut oqaasilinnut nutserissussisoqarnavianngitsoq.

Sammineqartussaq tassaavoq Jette Rygaardip kalaallit inuusuttaasa tusagassiuutinik atuinerannik misissuisimanera. Oqaatigineqarpoq pineqartut tassaasut illoqarfinni najugallit 12-niit 25-nut ukiullit, piffissarlu pineqartoq tassaalluni 1996 – 2016.

– Qallunaatuinnaq ingerlanneqartussaq minnerpaamik kalaallisut nutserneqartariaqaraluartoq. Kalaallit Nunaata Ilimmarfiani qallunaatuinnaq ingerlatsisarneq naammaginanngilaq. Inuppassuarnut ilaaffigineqarsinnaanngitsunik aaqqissuisarneq naligiisitsilluni ingerlatsinerunngilaq, INUA-mi pikkorissaasartoq, Henriette Berthelsen oqarpoq.

Ilisimatusarfik oqaatsit pillugit politikkeqarpoq. Tassani ilaatigut politikkip qanoq paasineqarnissaa sammineqarpoq, aamma oqaatsinik pingasunik atuisuuneq Ilisimatusarfimmut ilisarnaataasoq erseqqissarneqarpoq:

“Oqaatsit pillugit inatsisip siunertaa assigiinngitsunik nassuiaanissamut periarfissiimmat […] erseqqissarneqassaaq Ilisimatusarfiup anguniagaasoq imatut paasimmagu:
– sulisut pisariaqartitsinerminnik nalunaartut oqaatsitigut piginnaasannik (kalaallisut, qallunaatut, tuluttut) siuarsaaffigineqassasut aamma kalaallit kulturiannik, oqaluttuarisaanerannik inuiaqatigiivinilu pissutsinik paasitinneqassasut.”

“Ilisimatusarfimmut oqaatsinik pingasunik atuisuuneq ilisarnaataavoq: kalaallisut, qallunaatut tuluttullu, atuartitsinermi ilisimatusaatillu paasissutississutaasarnerini.”