Ilisarnarsereerpoq

AAQQISSUISUT. Unnuk nuannersumik atussamaarlugu nalaasaarfimmut ingippugut. Nuna tamakkerlugu qineqqusaartut aallakaatinneqarnissaat siulleq aallartippoq. Pakatsinngilagut. Allamimmi naatsorsuuteqarsimanngilagut.

Naatsorsuutigisimanngilarput KNR-i piareersarluarsimassasoq, aamma toqqaannaq aallakkatitsineq ukiorpassuit ajunnginnasoralugu misilittareerlugu ilikkarsimassagaat naatsorsuutigisimanngilarput. Nunat allat tv-qarfiisa ulluinnarsiutigisaat naagga uagut iluatsissinnaannginnguatsiarparput. Kipisaqattaarnerit imaaginnavipput. Aamma aallakaatitsisut eqqaamagaanngamikku ajutoornertik ilisimatitsissutigisarpaat – qujanaq.

Kipisaqattaarnera taannaali. Allatut ajornarsimappat allatut ajornarsimassaaq. Mumisitsinianngilagut. Ullunili tulliuttuni qineqqusaartitsisarnissani nuannaannginnermik takutitsiviusussat takorluulereerpavut. Taakku ajorneraat.

Qinersineq, inuiaat nuannaarlutik oqartussaaffimminnik nalliuttorsiorfissaat, KNR-imit nuannaarnermik takutitsiviunani annukujunnermik taarserneqartarpoq, aamma oqallinneq pingaarnerutinnagu kipisaqattaartumik ataqatigiinngitsumillu oqallinnermik ingerlatsisarneq KNR-ip ataqqinaatigaa. Ippassarlu allanngortoqarsimanngilaq. Nuannaarnermik takutitsilluni aallakaatitsinissaq inerteqqutaanngikkaluarpoq. Taamak pissusilersortoqarsinnaappat assilissap nipaatalu kipisaqattaarnerat atoruminarnerussagaluaqaat.

Takorluulereerparpullu: Qinersinerup unnussaa. Allanngortoqarsimanngippat aammaarluta annertuumik misilinneqaatigisassarput.

 

 

 

Aaqqissuisut

Nunarput pillugu sammisaqarfik

%d bloggers like this: