Ilinniarsimasut tamarmik atorfissaqarput

Kalaaleq ilinniagaqarsimasoq ilinniarnermi kingorna atorfissaminik qulakkeerinniffigineqarsimassaaq. Partii Naleraq sinnerlugu Inatsisartunut qinigassanngortittoq, Kim Høegh-Dam isumaqarpoq, ilinniagaqarsimasut tamarmik pinngitsooratik suliffissaqartinneqassasut.

– Ilumoorsinnaanngilaq ilinniagaqarnissamik kissaateqariarluta ilinniagaqarsimasut atorfissaqartinngikkutsigik. Inuusuttortatta ilinniarsimasortattalu tamarmik nalussanngilaat, ilinniagaqarnerup kingorna nunaminni atorfissaqartinneqaramik, Kim Høegh-Dam tusagassiuutinut allappoq.

– Qitiusumik atorfiit tamakkiisumik nalunaarsorneqarnerisigut nakkutigineqarnerisigullu tamanna pissaaq, ilinniartullu tamarmik atorfinnut sorlernut naleqqussinnaanerat ilisimaqqissaarneratigut.

– Ilinniartoq naammassilerpat neqeroorfigineqassaaq, ilinniarsimasaminut tulluuttumik atorfissaqartinneqartoq.

– Tikisitsinikkut inuiaqatigiit ineriartortinneqarsinnaanngillat, aamma taamaakkami ilisimaqqissaarneqartariaqarpoq, kikkut qaqugu naammassissanersut, taamaaliornikkut tikisitsinnginnissaq pilersaarusiorneqarsinnaanngorniassammat.

– Ullutsinni ima inissisimavugut, ilinniarsimasortatta ilaat “atorsinnaanngitsutut” nalilersorsimallutigik, aamma inuit misilittagaqarluarsimasut assinganik pissusilersorfigaavut. Tamannalu attanneqarsinnaanngivippoq, Høegh-Dam oqarpoq.

– Inuiaqatigiinni tamatta atorfissaqartinneqarpugut. Immitsinnut periarfissaarutsitaanissatta anguniarneqarnerat massakkorluinnaq unittariaqalerpoq. Innutaasugut tamatta atorfissaqarpugut, aamma pingaartumik ilinniagaqartortatta atorfissaqartinneqarnertik ilisimassavaat, Kim Høegh-Dam oqarpoq.

 

Aaqqissuisut

Nunarput pillugu sammisaqarfik

%d bloggers like this: