Ila angallanneq ajorluinnarpoq

Tupinnarpoq Disko Linep pisortaa akisinnaammat Kujallermi angallanneq ajoquteqanngitsoq. Isiginngitsuusaarluni ingerlatsiniarneq naammaleqaaq, Monica Dorph oqarpoq.

– Naammaleqaaq. Pissutsit ilisimasaqarfigilaarsimagaanni qanoq taamak akisoqarsinnaagami, Qaqortumi najugalik, Monica Dorph aperivoq.

Monica Dorph.

Qisuariarneranut pissutaavoq, Kujallermi angalaniarnerup kipiluttunarnera pillugu isornartorsiuisoqarneranut atatillugu, Disko Linep pisortaa Frederik Sandgreen tusagassiuutitigut akissuteqarmat, Kujallermi angalaniarnermut pissutsit ajorluinnartutut saqqummiunneqarnerat eqqunngitsoq.

Monica Dorph oqarpoq, taamak akisoqarsinnaanera nammineq paasisinnaanngikkini. Tassami pissutsit qanoq inissisimanerannut ilisimasaqartoqarsimassanngimmat.

– Pissutsit piviusut tassaapput, Kujallermi angalaniarneq erloqinarlunilu akisummat. Taamaattumik sukumiinerusumik iliuuseqartoqarniarnissaa naatsorsuutigisimagaluarparput. Angalaniarneq pissutigalugu Kujallermi suna tamarmi unittoorluinnarsimavoq.

– Eqqarsarpunga aatsaat ajutoortoqavippat ajunaartoqarpallu akisussaasut qisuariassasut. Inuit peruluttut inuunerminnik navianartorsiortut isorliunerusuniittullu pilliutaassappat, taanna aperivoq.

– Suliffeqarfik inuiaqatigiit tapiissutaanik toqqammaveqarluni ingerlatsisoq pisussaaffeqarnerusutut misigisimasariaqarpoq. Aamma asuliinnaq kusanartunngortitsiniarluni oqalussanngilaq. Neriorsuutigisimasat naapertorlugit ingerlatsisariaqarput. Taamaattumik piaarnerpaamik patsisissarsioratik aaqqiissutissanik ujartuisariaqarput.

– Suliffeqarfik angallassinermik ilisimasaqarsimaguni, takorusupparput pilersaarusiat sukumiisut, Kujallermut tamarmut atuuttussat, aamma sikorsuaqarnerani qanoq iliortarnissaminnik ilisimasaqarnermik takutitsisut.

– Sikorsuit ukiut tamaasa takkuttartut Disko Linep uippakajaarutigigunigit, tamanna ilisimasaqannginnermik takutitsineruvoq, pitsaanerungaanngilarlu usit suli ajornerusumik passunneqarmata. Inuussutissarsiortut ilanngullutik annertuumik eqqugaaqqapput.

– Qanittukkut Royal Arctic Line Nuummut usinik assartuilluni kinguaatuulaarsimammat kikkut tamarmik suaartartorsuupput. Pissutsit tamakku maani ulluinnarsiutigaavut, Monica Dorph oqarpoq.

 

Aaqqissuisut

Nunarput pillugu sammisaqarfik

%d bloggers like this: