Naalakkersuisoq Vivian Motzfeldt aamma operamik erinarsortartoq Ida Heinrich. Assiliisoq: Naalakkersuisut.

Ida Heinrich nersorneqarpoq

Kulturikkut Nersornaat operamik erinarsortartumut Ida Heinrichimut tunniunneqarpoq, filmiliortartorlu Marc Fussing Rosbach kajumissaatisivoq.

Naalakkersuisunut ilaasortaq Vivian Motzfeldt, Katuami nersornaatit taakku marluk Inuiattut Ullorsiornitsinnut atatillugu tunniuppai.

Marc Fussing Rosbach kajumissaaserneqarpoq. Suliai uani alakkakkit: https://www.furos-image.net/

– Klassiskimik ilinniagaqarnini tunuliaqutigalugu nunatsinni erinarsornikkut kulturitta nutarteriffigineqarnera ineriartortinneqarneralu peqataaffigisimavaa. Inuit amerlasuut erinarsornermigut tuppallersarlugillu qiimmassartarpai. Tamatsinnullu ersarippoq erinarsorneq inuunermini ilisarnaataasa ilagilluinnaraat. Amerlasuunut maligassiuisuuvoq nunatsinnilu inuianni klassiskiusumik nipilersoriaatsimi sallersaalluni, Vivian Motzfeldt ilaatigut Ida pillugu oqarpoq.

Kingorna Marcimut saappoq.

– 2017-imi nunatsinni filmi takorluukkanik imaqartoq siullerpaaq ”Akornatsinniittut – Tarratta nunaanni”-mik qulequtalik saqqummersippaa. Filmi namminiinnangajak suliarisani, manuskriptiliorlugu, ilitsersuisuuffigalugu, peqataaffigalugu, nipilersuusiorlugu, killorlugu tigussaasunillu misigisassanik immerlugu suliarisani. Takusassiisarnermi annertuumik piginnaaneqarpoq, aammalu teknikimut tunngasuni assilissallu qanoq atornissaannut paasisimasaqarluarluni, Naalakkersuisoq ilaatigut oqarpoq.

Assilissat:

Aaqqissuisut

Nunarput pillugu sammisaqarfik