Icelandair 160 millioninik annaasaqarpoq

Ukiup kvartaliisa aappaanni Icelandair 160 millionit koruunit missaanik annaassaqarpoq (2,7 mia. ISK). Taamak ullumi juulip 31-ani timmisartortitseqatigiiffik avammut ilisimatitsivoq.

Icelandairip Air Iceland Connect ilanngullugu piginneqataaffigaa, taannalu nunatsinnut angallassisarluni ingerlatsisarpoq.

Icelandairip pisortaa, Björgólfur Jóhannsson, tusagassiuutinut nalunaarummi allappoq, angusat ilimagisamit ajornerusimasut, aamma timmisartortitseqatigiiffik “unamminartorsiorfiusunik” nalaataqartoq.

– Ilimagisimagaluarparput akigititavut agguaqatigiissillugit qaffariaateqarsinnaassasut, kisianni tamanna suli pisimanngilaq. Aamma tamanna pinngilaq, naak uuliap akia qaffassimagaluaqisoq. Suliaqarfimmi unammineq aatsaat taamak sakkortutigaaq, tamannalu angusani takutinneqarpoq. Naatsorsuutigaarput uagut atorluta angalajumasut amerliartortillugit, agguaqatigiissillugu akit ilanngullutik qaffakkiartorsinnaassasut, Björgólfur Jóhannsson oqarpoq.

Taassuma erseqqissarpaa, naak timmisartortitseqatigiiffik unamminartorsioraluartoq, taamaattoq siunissamut unammillernissaq inissisimalluarfigigitsik.