IA: Nunarsuarmioqataaniarpugut?

IA-p siulittaasua tusagassiuutinut nalunaaruteqarluni oqarpoq, kissaatigigini siunissaq neriuuteqarfiulluartoq pilersinneqarsinnaasasoq.

– Qinersineq nunatta siunissaanut aalajangiisuussaaq, avammut alakkaamasaqarnikkut akornatsinnilu kiinnertarnikkut. Inuiaqatigiinni naleqartitat suut ilisarnaatigissanerivut qineqqusaarnermi qitiussaaq, Sara Olsvig oqarpoq.

IA-p tusagassiutinut nalunaarutaata saqqummernerata kingorna tusagassiuutit ilaasa sammiligaat tassaavoq qallunaatuuani allassimasoq “Tiden er inde til aktivt at bekæmpe fremmedhad”. “Fremmedhad” (takornartanut uumissuineq) kalaallisuuani ersinngilaq.

– Nunatta siunissaanut piffissamut aalajangiisuusussamut appakaappugut. Inuit taakkuinnaavugut ataatsimoorlutalu inuiaqatigiinnik nukittuunik imminullu napatittunik sanarfinissamut anguniagaqaqatigiippugut. Aporaanneq ajornartorsiutinik sunilluunniit aaqqiineq ajorpoq ataatsimuulersitsinerlu ajorluni. Immikkoortitsinermit ajattuinermiillu nuannersunik pilersitsisinnaanngilagut, taanna oqarpoq.

– Inuiaqatigiinni oqaatsit aammalumi sumiuussuseq tunngavigalugu aporaannerit suli nukippassuarnik atuiffigisarivut takusinnaavarput. Ukiuni makkunanerpiaq naligiissitsinissamik siuarsaanissaq pingaartipparput. Kikkut tamarmik ilaanissaat qulakkeertariaqarparput, kikkut tamarmik inissaqassapput, Sara Olsvig oqarpoq.

Tunngaviusumik inatsisiliornermut tunngatillugu IA-p erseqqissarpaa, tunngaviusumik inatsisiliorluni sulinermi naligiissitsinerup qitiutinneqarnissaa qulakkeerneqassasoq.

– Inuiaqatigiit nammineq naleqassutsimik misigisimanerput upperivara. Inuit Ataqatigiit isumaqarput, siuariartortoqassappat tunngaviusunik naleqartitat qaqinneqartariaqartut, tunngaviusumik naleqartitat tassaammata qanoq inissisimanitsinnut takussutissiisut. Tamatta atorfissaqartinneqarlutalu naligiippugut. Inuit assigiinngisitaartut suleqatigiissinnaanerat piffissanngorpoq, aamma oqaluttuarisaanitsinni annernarsinnaasunik pisoqarsimagaluartoq, Sara Olsvig IA-p internetimi quppernerini oqarpoq.

 

Aaqqissuisut

Nunarput pillugu sammisaqarfik

%d bloggers like this: