Edmonton Eskimos allamik taaguuserneqaqqugai

Canadap immikkoortuani, Albertami, naalakkersuisut siulittaasuat Rachel Notley oqarpoq, Edmonton Eskimos aterutsiminnik allannguinissamut siuttuusariaqartut – amerlasuummi oqaaseq ‘eskimos’ ajuallannartippaat.

The Canadian Pressimit apersorneqarluni Rachel Notley oqarpoq, arsaattartut taakku taamaaliornermikkut siuttuulluarnermik peqataatitsinerminnillu takutitsissagaluartut, aamma Inuit ilanngullugit.

Notleyip ilanngullugu oqaatigaa nammineq qanoq iliornissaanik ilitersuunnianngikkini, kisinni apeqqummut tamatumunnga inuit qanoq isumaqarnersut tusarusukkini.

– Inuit amerlasuut Eskimos ajuallannartutut paasisarpaat, minnerpaamillu atorneqarnera nunat killiit nunasiaateqarsimaneranit pisuuvoq, Notley oqarpoq.

Ukiuni kingullerni Edmonton Eskimos taaguutaat allanngortinneqartariaqartoq eqqartorneqartarsimavoq. Arsaattartut Edmonton Eskimos qaammammi uani oqariartorput, kikkut tamarmik tusarnaaqqissaaritik.

Canadap naalakkersuisuisa siulittaasuat, Justin Trudeau, pingasunngormat apeqqummut akuliupportaaq:

– Erseqqippoq tamanna saammaateqatigiinnissamut ilaasoq – iluarineqanngitsut tusarnaarnissaanut aamma qangali ileqquliunneqarsimasut allanngortinneqarnissaanut. Saammaateqatigiinnissaq tassaaginnanngilaq nunat inoqqaavisa naalakkersuisullu suliassaat; Canadami najugaqartugut tamatta pineqarpugut, eqqarsarpungalu apeqqutip oqallisigineqarnissaa pingaaruteqartoq, Trudeau, The Canadian Pressimut oqarpoq.

 

Aaqqissuisut

Nunarput pillugu sammisaqarfik

%d bloggers like this: