Avannaani Ilinniarnertuunngorniarfik. Assiliisoq: GUX

Dorthie Siegstad rektoritut

Dorthie Siegstad aggustusip aallaqqaataaniit Avannaani ilinniarnertuunngorniarfimmi rektoritut sulissaaq.

Dorthie 1997-imiilli atuartitsinermik suliaqalerpoq, GUX-imi ilaatigut ilinniartunik siunnersuisuusimalluni allaffissornermillu nakkutilliisuusimalluni. Kalaallit oqaasiinik ilinniartitsissutinillu kulturimut tunngasunik atuartitsinerup avataasigut ilinniartunik siunnersuisutut ilinniaqqinnikuuvoq aammalu oqaloqatiginnittartutut piginnaasaqarluni.

Dorthie Siegstad.

Ilinniaqqinnermini kingullermi ilinniarnertuunngorniarfinnik aqutsinermik aaqqissuussinermillu Syddansk Universitetimi piginnaanngorsaqqippoq aamma ilinniarnertuunngorniarfinni perorsaanikkut ilinniartitsinikkullu masteritut soraarummeeruteqarsimalluni. Dorthie Siegstad atorfeqarnermini Aasianni sulisimavoq. Aappanilu marlunnik qitornaqarput.

– Ilinniarnertuunngorniarfik nukittorsarlugu sulisunik, ilinniartunik angajoqqaanillu suleqateqalernissara qilaaraara. Neriuppunga meeqqat atuarfii, ilinniarfiit allat, Aasianni innuttaasut qinikkallu peqatigalugit ilinniarnertuunngorniarfik inuiaqatigiinni nukittorsarneqarumaartoq. Suleqatigiinnermi siunertaajuassaarmi inuusuttut ilinniagaqarusussusiisa nukittorsartuarnissaat. Inuiaqatigiit kivissinnaajumallugit inuusuttut tamaasa nunatta pisariaqartippai, Dorthie Siegstad oqarpoq.

Aaqqissuisut

Nunarput pillugu sammisaqarfik