Demokraatit: Kiffaanngissuseq innuttaasunut uterteqqinneqassaaq

Ullumi Demokraatit ilaatigut qineqqusaartussatut nalunaarsorneqarallarsimasut avammut nittarsaakkumallugit tusagassiuutinik katersortitsipput.

– Misigisimavugut annertuumik inuttut ataasiakkaatut kiffaanngissusiiagaassimalluta, kiffaanngissuserlu innuttaasunut uterteqqinneqartariaqarpoq. Tamanna annertuumik qineqqusaarnermi sammissavarput, Demokraatit siulittaasuat, Randi Vestergaard Evaldsen oqarpoq.

Randip ilanngullugu oqaatigaa, maanna Demokraatit sinnerlugit qineqqusaartussat ima amerlatigilersimasut, akisussaaffimmik ataatsimut tigusinissamut piareersimasutut misigisimallutik.

– Tamatta immikkut piginnaaneqarpugut, aamma nunarput ataatsimut isigalugu siammasissumik inissisimavugut.

– Sulisinnaasut sulissapput, pillarneqassanngillat. Sulisinnaasut aningaasarsiamik annertunerpaartaat tigummiinnartassavaat, aamma sulisinnaasut amerlanerit periarfissaqartinneqarlutik sulissapput, tamatta qimoqataasariaqarpugut, Randi Vestergaard Evaldsen oqarpoq.

Steen Lynge, maanna Atassummit tunuarluni Demokraatit sinnerlugit qineqqusaarnissaminik nalunaaruteqartoq oqarpoq, ilaatigut utoqqaat atugaat pillugit qineqqusaarnermi sammisaqarniarluni.

– Pingaartippara innutaasut tamarmik assigiimmik pineqarlutik inuiaqatigiit sanarfineqassasut, taanna oqarpoq.

– Maanna naalakkersuisuutitaqartut imak aaqqissuussisimapput, illuliornermut pisortat inunnut atukkiuttagaat, Nuuk eqqarsaatigalugu 2027-miit atorunnaarsinneqassasut. Tamanna pissusissamisoorsinnaanngilaq, aamma atorunnaarsinneqarnissaa sulissutigissavara, Steen Lynge oqarpoq.

 

Aaqqissuisut

Nunarput pillugu sammisaqarfik

%d bloggers like this: