Danmarkip tunuani inuugatta mattunneqariartorpugut

AAQQISSUISUT. Ukiuni kingullerni – pingaartumik qulit kingulliit ingerlaneranni – Danmarki sakkortusiartuinnartumik imminut naammagaluni mattuttutut pissuseqaleriartuinnarsimavoq.

Imminut mattukkiartorneq takornartat amerlavallaalinnginnissaannik siunertaqarpoq, aamma Dansk Folkeparti siulersortigalugu ukiuni kingullerni sorsuffinniit, kaaffissuarniit ajunaarnersuaqarfinniillu qimaasut ilanngullugit takunngitsuusaarneqartunut nunamullu isertinnaveersaarneqartussanut ilanngutitinneqarput.

Politiki taanna Dansk Folkepartip ukiorpassuarni kisermaassiffigisimasaa, maanna Folketingimi partiinit amerlanerussuteqartunit tapersersorneqalersimavoq, taakkununngalu ilaapput Socialdemokratit, Konservativit Venstrelu.

Danmarkip imminut mattukkiartuinnarnera Kalaallit Nunaannuttaaq sunniuteqarpoq. Nunap taassuma tunuani inuugatta, Danmarkimut kikkut appakaatinneqarsinnaanerat uatsinnuttaaq toqqaannaq annertuumik sunniuteqarpoq. Assersuutigalugu sulisussat atorfissaqartitavut aatsaat Danmarkimit akuerineqaqqaarsimagunik nunatsinnut suliartorsinnaapput, pingaartumik Nunat Avannarliit avataanniit orniguttussaappata.

Kingullertigut Demokraatit oqariartuuteqarput, ilinniarsimasut pissariaqartitavut ajornannginnerusumik nunatsinnut suliartorsinnaanissaat aqqutissiuunneqartariaqartoq, aamma Danmarkimiit pisuunngikkaluarpata ajunngitsoq.

Naalakkersuisut pingaarutilimmik suliassaqarput, tassalu Danmarkip nunamut namminermut politikia, nunatta matuinneqarnissaanik kinguneqassanngitsoq.

Tikinneqarsinnaanerput pisariaqanngitsumik aporfilersorneqartariaqanngilaq, pingaartumik nunatsinni inuujumasut ikiliartuinnartillugit. Immaqalu perngarluni Kalaallit Nunaat namminerisaminik politikeqalersinnaavoq. Taamaassappat mumisitsiningajak pissagaluarpoq.

Suna tamarmi killissaqartarpoq. Aamma Danmarkip tunuani nunatut mattuttutut inissisimaneq taamaappoq.