Cape Dorsetimi kulturikkut illorsuartaaq. Assiliisoq: William Huffman

Cape Dorset kulturikkut illorsuartaassaaq

Angusaq imaannaanngilaq, eqqumiitsuliortut oqarput. Canadami Cape Dorsetimi kulturikkut illorsuaq katersuiniarnikkut piviusunngortinneqarsimavoq, aningaasanillu katersuiniartuusimapput Cape Dorsetimi innuttaasut aamma suliffeqarfik West Baffin Eskimo Co-operative. Katillugit 63 millionit koruunit katersorneqarsimapput.

Cape Dorset.

Illorsuaq septembarimi atoqqaarfissiorneqassasoq naatsorsuutigineqarpoq.

– 1980-ikkunni arlaatigut kulturikkut illoqalernissarput pilersaarusiulersinnaannginneripput eqqartortarsimavarput, kingornali aningaasatigut ingerlalluannginneq pissutigalugu pilersaarut uninngatinneqarsimavoq, pilersitseqataasut ilaat, Jimmy Manning CBC Northimut oqarpoq.

– Illorsuaq nutaaq takullugu assut tulluusimaarpunga aamma nuannaaqaanga, taanna ilassuteqarpoq.

William Huffman, Dorsetimi eqqumiitsuliortut tuniniaasartuat oqarpoq, takorluugaannaasimasoq maanna piviusunngormat iluatsitserujussuarsimasutut misigalutik.

– Una Cape Dorsetimut pingaaruteqaannarani aamma Avannaanut tamarmut pingaaruteqalersussaassaaq, taanna oqarpoq. – 63 millioniniit akisunerujussuartut isikkoqarpoq.

Illorsuaq inuusuttunut, innuttaasunut utoqqarnullu kulturilerinermut atorneqartassaaq, aamma utoqqaat tassani iluatsittumik katersuutsinneqareersimapput. Inuit akornanni eqqumiitsuliortoq, Kenojuak Ashevak, atsiunneqarsimavoq. Taanna 2013-mi toquvoq.

Pilersaarutaavoq maanna eqqumiitsuliat toqqorterneqarsimasut tassani saqqumilaartinneqalernissaat.

Illorsuup ilua sanaartorneqartoq. Septembarimi atoqqaarfissiorneqassasoq naatsorsuutigineqarpoq. Assiliisoq: William Huffman

Aaqqissuisut

Nunarput pillugu sammisaqarfik