Cannabisi pillugu Iqaluit piareersalerpoq

Nunavummi illoqarfiit pingaarnersaat, Iqaluit, Canadami cannabisip inerteqqutaajunnaarsinneqalerneranut piareersarluni aallartinnialerpoq. Malittarisassaliornerit inuit tamat naapittarfiinut tunngassuteqassapput. 

– Iqaluit nammineq cannabisip atugaanissaanut tunngatillugu aalajangersaassaaq. Ukiaru inerteqqutaajunnaarpat qanoq illoqarfimmi atuisoqarnissaanut malittarisassat piareersimasariaqarput, illoqarfiup aqutsisuinut ilaasortaq, Kyle Sheppard, Nunatsiaq Newsimut oqarpoq.

– Isumaqarpunga maannamut iliuuseqarsimanngitsugut. Qanoq cannabisip atugaanissaa oqaluuserisariaqarpoq aamma atorfillit qanoq malitassaqakannernissaat ilanngullugu, Sheppard oqarpoq.

Malittarisassat tamakku timersortarfiit allallu silataanni pujortarnissamut tunngassuteqassapput, aamma malittarisassat iluarnerpaassappat ukiaru piareersimasariaqarput.

– Malittarisassat nutaat suliarineqaraangata sivikinnerpaamik qaammatit marluk atorneqartarput, taanna oqarpoq.

Borgmesteri Madeleine Redfern oqarpoq, sulisut paasissutissanik katersaqalernissaanik peqquneqassasut. Taassuma erseqqissaassutigaa kommunimi aqutsisut nunap immikkoortuani inatsisinut malinnittussaasut.

– Qitiusumik naalakkersuisut qanorluunniit periuseqarniarpata, tamanna inunnut pujortartartunut kinguneqartussaavoq, apeqqutaatinnagu sikaritsi imaluunniit cannabisi pineqarnersoq, Madeleine Redfern oqarpoq.

Nunavummi tupa pillugu inatsit ullumi atuuttoq oqarpoq, pisortat illuutaata eqqaani pujortartoqartillugu isaariaq ingalasimaneqassasoq aamma atuarfiit isaariaat pineqartillugit minnerpaamik 15 meterinik ingalasimaneqassasut.

 

Aaqqissuisut

Nunarput pillugu sammisaqarfik

%d bloggers like this: