Tuluit aalisartui EU-mit aninissaq kissaatigalugu takutitsisut. Assiliisoq: Facundo Arrizabalaga

Brexit: Niuerneq pisassallu immikkoortissapput

Tuluit Nunaata EU-miit aninissaanut tunngatillugu isumaqatigiinniarnerit maannamut niueqatigineqartunut ernumatitsisarsimapput. Tuluilli maanna oqarpoq, niueqatigiinnermut pisassiissutinullu tunngasut immikkoortillugit sammineqassasut. Taamalu ajornannginaarnissaq ilimagineqanngilaq.

Ippassaq Tuluit Nunaanni tamanut ammasumik tusarniaaneq aallartippoq, sapaatip-akunnerinik qulinik sivisutigisussaq. Tassani ilaatigut naalakkersuisut allapput “aalisakkanik nioqqutissiassat siunissami niueqatigisassanut atatillugu isumaqatigiissutigineqarumaartut, aamma tamanna nioqqutissiassat allat assigalugit inissisimassasoq”.

Aamma atuaruk: Brexit: Atasinnaasumik aalisarneq qitiussaaq

– Apeqqut tamanna pisassiissutinut (aamma allamiut pisassinneqarsimaneranut, aaqq.) atatinneqassanngilaq, apeqqullu immikkoortillugu sammineqarumaarpoq – tamannalu Tuluit Nunaata sinerialittut namminersortutut inissisimaneranut atatillugu sammineqassaaq, naalakkersuisut tusarniaassutigisaminni allapput.

– Apeqqutinut tamakkununnga isummernerit nunat tamalaat akornanni niueqateqarnermut ilanngullugit sammineqassapput, aamma ullumimut nunat EU-p avataani inissisimasunut ileqqorineqareersut naapertorlugit, naalakkersuisut allapput.

Tuluit Nunaatali taamak ajornannginaarnissaa ilisimasalinnit ilimagineqanngilaq.

Norgep Tuluit Nunaatalu akornanni januaarimi Brexit pillugu isumasioqatigiittoqarmat inerniliunneqartut ilagaat, Tuluit Nunaata piumasani iluatsinnavianngikkaa.

– Niuerneq aamma pisassiissutit immikkoortinneqarnavianngillat. Norgep EU isumaqatiginninniarfiginerani tamannarpiaq misilikkaluarpaa, iluatsinngilarlu, Sebastian Metz oqarpoq. Taanna pineqartumut ilisimasaliuvoq, Sakana Consultantsimilu sulilluni.

– Ilisimasavut naapertorlugit EU-p suli anguniarpaa, niuerneq pisassiissutillu ataqatigiissinneqassasut. Apeqqutaaginnartoq tassaavoq kina uisoreqqaassanersoq, taamani Sebastian Metz Undercurrentnewsimut oqarpoq.

Aaqqissuisut

Nunarput pillugu sammisaqarfik