Atuisut pineqarunik taakku pilik

AAQQISSUISUT. 2000-mi aalakoornartortalinnik nioqquteqartarneq sassaallertarnerlu pillugit inatsisiliornermut atatillugu “Imigassaq ikiaroornartullu pillugit Siunnersuisoqatigiit” pilersinneqarput. Kingullermik tamanit ilisimaneqartumik tutsaqaramik tamanna 2014-imi ukiumoortumik nalunaarusiormata pivoq.

Nalunaarusiaq arfinilinnik quppernilik suliaqartoqarsimannginneranik takutitsivoq, tassami atuagaaqqamik saqqummersitserpaluttut kisiat tusartarpavut. Iluamillu katiterneqarsimasuugunik inatsit naapertorlugu suliassaqaraluarput:

  • Atornerluiffiusuni tamakkiisumik suliniuteqarnissamut anguniagassatut iliuusissatullu pilersaarutinik siunnersuusiorneq.
  • Ilisimatusarfigisassanik pisariaqartinneqartunillu tikkuussisarneq.
  • Paasissutissanik ilisimasanillu katersinermi, ataqatigiissaarinermi aamma ilisimatitsissutinik ingerlatitseqqinnermi ikiuunneq.
  • Imigassap ikiaroornartullu atugaanerat pillugu Naalakkersuisunut ukiumoortumik nalunaarusiortarneq, tassunga ilanngullugu imigassamik ikiaroornartunillu atornerluinerup appartinneqarnissaanut imaluunniit pinaveersimatinnissaanut suliniutissanik innersuussuteqartarneq.
  • Pisortat tusarniaassutaannut sulianut attuumassuteqartunut atatillugu tusarniaassutigineqartunut akissuteqartarneq.

Pisortat pilersitaat innuttaasunut atuisunullu attuumassuteqaratik ingerlatinneqartut allat assigalugit Siunnersuisoqatigiit naalakkersuisoqarfippassuarnit assigisaaniillu ilaasortalersorneqarsimapput, aamma kingullertigut pinnguarnermut imminut nangarsinnaanngitsut “sinniisussaat” ilanngutitinneqarpoq.

Peqataanngitsut tassaapput pineqartut: Atuinerlunnermik inuuneqarlutillu inuuneqarsimasut, taamalu allanit ilisimasaqarnerullutik qanoq aniguisoqarnissaanik ilisimasallit – atorneqarsinnaasunillu tikkuussisinnaasut.

Tamannalu ajuusaarnarpoq, tassami Siunnersuisoqatigiit Naalakkersuisunut  siunnersuinermik ingerlatsisussaapput, aamma pineqartumi ilaqutariippassuarnut pingaarutilimmi asuli oqalunnatik inuit pisariaqartitaat naapertorlugit suliniartussaapput.

Pineqarniartussalli peqanngillat. Pineqanngitsut ataatsimiittarfiliuussimavagut.

Nunat allat assigalugit atuinerlunnermik inuunillit inuuneqarsimasullu peqatigiiffiliortariaqalerput, taamalu sulineq pimoorussaq kinguneqartussarlu aallartillugu.