Aleqa Hammond. Assi: Wiki

Atlantikup Avannaa arfernut eqqissisimatitsivinngussanngilaq

Aleqa Hammond (NQ) aamma nunanut allanut ministeri Anders Samuelsen (LA), Arfanniarneq pillugu Ataatsimiitsitaliarsuup (IWC) ataatsimiinnissaanut piumasaqaatissat pillugit matoqqasumik ullumi isumasioqatigiipput.

Aleqa Hammond tusagassiuutinut nalunaaruteqarluni allappoq, Danmarki, Kalaallit Nunaat aamma Savalimmiormiut ataatsimoorlutik peqataasarmata sammivissaq oqaluuserineqassasoq.

IWC-mi isumaqatigiinniutaasarput Kalaallit Nunaata qanoq amerlatigisunik arfattassaqassanersoq, tamakkununnga ilaallutik tikaagulliit, tikaagulliusaat, qipoqqaat arfiviillu.

IWC ukioq manna Brasiliami septemberip qulinganniit 14-at ilanngullugu ataatsimiissaaq, ataatsimiinnermilu 2019-miit 2025 ilanngullugu pisassarititaasussat isumaqatigiinniutaassapput.

Aleqa Hammond matoqqasumik isumasioqatigiinnermiit toqqaannartumik nalunaaruteqarsinnaatitaanngilaq, taamaattorli Kunngeqarfiup Danmarkip IWC-mik isumaqatigiinniartussanngornera pillugu oqaaseqarpoq.

– Pingaaruteqarluinnarpoq Danmarkip Kalaallit Nunaata soqutigisaanik naapertuilluni aalajangiussaqartarnissaa naqissusissallugu, minnerunngitsumillu ilisimasallit siunnersuutaannik ataqqinnittarnerput pillugu. Pingaaruteqarportaaq Danmarkip Kalaallit Nunaata killeqarfiisa avataanni pisussanik eqqartuisoqartillugu oqallinnernut ilannguttarnissaa, Aleqa Hammond allappoq.

– Siunissami Kalaallit Nunaannut pingaaruteqalersinnaasunik oqaluuserisassat ilaqarput. Isumaqatigiinniaqataasussat piumasaqaateqartariaqarput, Atlantikup Kujataani arfernik eqqissisimatitaaffeqarfissatut pilersaarutaasut, Atlantikup Avannaani eqqissimatitaaffinngortitsinermik kinguneqassanngimmata, Aleqa Hammond oqarpoq.

Aaqqissuisut

Nunarput pillugu sammisaqarfik