Siverth K. Heilmann. Assiliisoq: NO

Atassut: Aningaasarsiorneq salliunneqartut ilagissavaat

Qinersivimmi atuuttumi aallaqqaamut partii Atassut marlunnik Inatsisartuni issiatitaqarsimagaluarluni, qinersiviup ingerlanerani ilaasortaatitaarussimavoq. Atassut sinnerlugu 2014-mi natsisartunut qinigaasut, Knud Kristiansen aamma Mala Høy Kuko, kingorna parteertik allamik taarserpaat.

Atassutip ukiorpassuarni ingerlatsisuisa ilaat, Siverth K. Heilmann, Nunarput apeqquteqarmat akissuteqarpoq.

Nunarput: “Qinersivimmi tullinnguuttumi suut salliutillugit anguniarniarpisigit?”

– Atassutip pingaarteqaa aningaasarsiornitta massakkornit pitsaanerujussuarmik isaatitsiviulerluni inissisimalernissaa. Namminiilivinnissamut Atassut akuerseqataanikuuvoq, siunissamili innuttaasut politikkerillu sanaartugassanut kissaaterpassuinut akissaqassagutta sulerusussuseq massakkornit pitsaanerujussuusariaqarpoq, aamma ilinniarluarsimassutsi annertusarneqartariaqarpoq, Siverth K. Heilmann oqarpoq.

– Avataaniik sulisussanik tikisitsisannginnissamik politikkeqarneq, nunatsinni suliffissaaleqisoqaraluaqisoq suliffinnut tamakkiisumik tunniusimannginneq, imminullu ataqatigiinngitsoqarnera, aaqqinneqartariaqarput. Aalisakkat takkukkaluttuinnarnerisa saniatigut, aatsitassarsiornerup takornariaqarnerullu aningaasarsiutinngornissaanut Atassut aqqutissiuussinissaminut piareersimavoq, Siverth K. Heilmann oqarpoq, nangillunilu:

– Qallunaat Nunaanniit akisussaaffippassuit suli 30 sinnillit tigunngisagut, inuttassaqartinnissaat aningaasassaqartinnissaallu peqqissaarullugit tigunissaanut isumaqatigiinniarnissamut piffissaqartariaqarpugut. Sukkasuumik Naalagaaffinngupallanniaannarluni siunnerfeqartunut Atassut isumaqataanngilaq. Isumaqarpugulli suli ikinnerpaamik ukiuni 25-ni tigusassagut nalilersorluaqqaarnissaannut suliaq ingerlaqqaartariaqartoq. Kinami oqarpa, Naalagaaffinngorutta pilluarnerinnavissuarmik Nunatsinni innuttaasugut atugaqalissasugut, Heilmanni oqarpoq.

Siverth K. Heilmannip ilanngullugu oqaatigaa, taaneqartut saniatigut peqqinnissaqarfinni ingerlatitsineq pitsaanerusariaqartoq; nappaateqalersimagutta nakorsiartarpugut ikiorneqarnissamik siunertaqartarluta.

– Suli nappaassuarmik nunatsinni annertusiartuinnartumik atugaqarnerput, nakorsiaraluarlunilu angerlartiinnarneqartarnerput kingunerluuteqartarput – aamma toqumik kinguneqartartut ikiliartunngillat. Tamakkuluunniit aaqqeqqaarsinnaasariaqarpagut, nakorsaqarnitta ikiorserneqarsinnaanittalu pitsaanerulersinnissaa aningaasaliinerunikkut siuarsarlugu, Siverth K. Heilmann oqarpoq.

Nunarput: “Inatsisartut suleqatigiittut pilersinniarlugit qanoq qulakkeerinneqataasavisi?”

– Qinersinerup kinguninngua Naalakkersuisunngortitsiniarnermi sapinngisamik silittumik isumaqatigiissinnaanerup anguneqarnissaa pingaaruteqaqaaq. Aamma assinganik pingaartigaaq, inatsisartuni siunnersuutinik isummanillu pitsaasunik saqqummertoqartillugu, Naalakkersuisuutitaqaannarneq pissutigalugu, siunnersuutinut itigartitsisarnerit ikinnerulersinnissaannut alloriartoqarnissaa, Heilmanni naggasiivoq.

 

 

 

Aaqqissuisut

Nunarput pillugu sammisaqarfik

%d bloggers like this: