Arctic Umiaq Line aamma avannamut

Maanna Ilulissaniit Qaqortoq tikillugu Arctic Umiaq Line umiarsuaataa Sarfaq Ittuk angalarsarpoq. Tamannalu Atassutip allannguiffigerusuppaa, Atassut sinnerlugu Inatsisartunut qinigassanngortittoq, Aqqalu Jerimiassen, oqarpoq.

Taanna tusagassiuutinut allagaqarluni oqarpoq, ukiorpanngortuni avannamut Ilulissat tikillugu angalasoqartartoq tamannalu apeqquserneqartariaqalersoq.

– Uummannaq Upernavillu umiarsuarmik aasaanerani tikinneqartalernissaat pisariaqaraluarpoq. Naluneqanngilaq maanna illoqarfinni pingasuni mittarfissuit pilersaarutigineqartut, Ilulissanilu mittarfiup tallineqareernerata kingorna takornarissat avannamuttaaq siammarterneqarsinnaalernissaat periarfissinneqartariaqarpoq, Aqqalu Jerimiassen ilaatigut allappoq.

– Silaannakkut angallanneq eqqarsaatigalugu, inuup akunnattumik isertitallip sipaggarilluinnartup kisimi nammassinnaasai pineqarput. Sinersortaammik aasaanerani angalatitsinerulernikkut nunatta iluani angallanneq eqaallisarujussuarneqarsinnaavoq, Atassut sinnerlugu Inatsisartunut qinigassanngortittoq, Aqqalu Jerimiassen oqarpoq.