Aqqaluaq B. Egede: Siulittaasutta saqqummiussai siunnersuutaannaapput

Ippassaq apriilip aqqarnganni unnukkut Narsap timersortarfiani qinersisartunut ataatsimiisitsisoqarpoq, inuillu aggialluarsimallutik qineqqusaarneq uummarissumik ingerlanneqarpoq.

Sorpassuit tikinneqarput, uteqqiaffigineqartorlu tassaavoq sumiiffimmi periarfissaaleqineq, aamma inuuniarnikkut atugassat ilungersunarnerat.

– Politikerit qinikkat arfineq-pingasut Kujallermi qinigaapput. Sulerisaramik? Inuit nukittuut anguniagallillu isertissigit, Partii Naleqqameersoq, Nikku Olsen oqarpoq. – Illorsuit assersuinnakkat amerlapput.

Parteeqataa, Kattie Nielsen assingusumik oqariartuuteqarpoq.

– Maani najugaqartugut naalakkersuinikkut sumiginnagaasimavugut, aamma kingorna kommunerujussuanngortitsinermi taamak pisoqarpoq. Allatuulli inoqarfiuvugut aamma ineriartussaagut, Kattie Nielsen oqarpoq.

Qinersisartut sammerusunnerusaat tupinnanngitsumik tassaavoq aalisarneq, tassami aalisarneq qineqqusaartut akornanni maannamut sammineqarnernut ilaavoq.

– Suliffeqarfissuit aalajangersimasut matuneqassapput aamma pisassiissutit allanut agguaateqqinneqassapput. Tamanna ukiut tallimanik piffissaliilluni pissasoq Siumup aalajangiusimavaa, Ineqi Kielsen oqarpoq.

Ineqip oqaaseqarnermigut Karl-Kristian Krusep siusinnerusukkut oqariartuutigisimasaa uterpaa, tassalu Siumup aalisarnermut tunngatillugu siunniussai imaaliallaannaq allanngortinneqarnavianngitsut.

Hans Enoksenip nunaqavissut salliutinneqarnissaat oqariartuutigaa.

– Uagut nunaqavissunik illersuisuunerput ersarinnerpaamik oqariartuutigiuarsimavarput. Ilumoorsinnaanngilaq allamiut pisassaqarteriarlugit uagut immitsinnut susaartissasugut, Hans Enoksen oqarpoq.

Hans Enoksenip oqaaseqarnerata kinguninngua Aqqaluq B. Egede apeqqut pillugu oqaaseqarpoq.

– Avataasiortunut pisassiissutinik uterartitsinissaq aalisarnermut inatsisissaq qaqinneqalermat sukataarutigerujussuarnikuuarput. Aamma Partii Naleqqap saqqummiussaanut tunngatillugu oqaatigissavara, Partii Naleraq Siumullu suleqatigalugit qaqitsisimagatta, Aqqaluaq B. Egede oqarpoq.

– Massakkullu siulittaasutta saqqummiussai tassaapput oqallinnermut aallaavissat (ukiuni 15-ini siumut ilisimatitsereerluni utertitsinissaq, aaqq.) . Inatsisiliassaanngillat, kisianni aningaasaqarnera, aalisartoqassuseq aamma aningaasarsiornikkut siuariartorneq illersorneqassalluni. Oqallinnissamut siunnersuutaapput allanngortinneqarsinnaasut, Aqqaluaq B. Egede oqarpoq.