Aningaasat sumut atorneqarnerat pingaartitatsinnut takussutissaapput

Ukiut arlallit qaangiupput KNR-TV aqqutigalugu Julie Edel Hardenberg taamak oqariatuuteqarmat. Tamanna pivoq eqqumiitsuliortut akornanni silarsuaq sammineqarmat.

Nunarput aperisimavoq, suli Julie taamak isumaqarnersoq, aamma oqariartuutini itisililaarsinnaannginnerai.

– Aap, suli taamak isumaqarpunga. Inuiaqatigiittut aningaasat Inatsisartutigut kommuninilu qanoq agguataarneqartarneri, akunnitsinni sunik pingaartitsinertinnik erseqqissumik oqariartortarput, Julie Edel Hardenberg oqarpoq, nangillunilu:

– Inuiaqatigiittut namminersornerulerattali taamaallaat ataqatigiinngitsumik politikkikkullu anguniagaqarpasinngitsumik eqqumiitsuliortunut/pilersitsiniartartunut aningaasaliisoqartarpoq, tamakkulu aningaasaliissutit naammaqqajaannartarput. Inuiaqatigiittut pingaartissimagutsigu pilersitsiortortunik peqateqarnissarput, taava tamanna aamma politikkikkut salliutinniarneqartut ilagisariaqarpaat, Julie oqarpoq.

Taassumap ilanngullugit assersuutigai isiginnartitsisarnerup filmiliortarnerullu iluani qanoq sivisutigisumik politikkikkut oqalorusaartoqarsimanera.

Paasissutissat_250
Julie Edel Hardenberg Nuummi inunngorlunilu perorpoq. Finlandimi, Norgemi, Tuluit Nunaanni Danmarkimilu ilisimatusarnikuuvoq. Kalaallit Nunaatta Danmarkillu akornanni pissaaneq naligiinngitsoq pillugu suliai apeqqusersuipput. Julie kulturinit taakkunannga marlunnit sorlaqarpoq, taamaalilluni kalaallit assigiinngitsut kinaassusaannut imminnullu paasinneriaasaannut apeqqusersuisarluni – minnerunngitsumik aningaasaqarneq innuttaaqataassuserlu Kalaallit Nunaatta Danmarkillu akornanni pituttoqqanera pillugit innuttaasunut sunniutai sammisarpai; pissaaniliulluni pissaaneerutsitsillunilu.

– Uanga allallu eqqumiitsuliortutut sulisut isumaliulersitsisartuuneq suliatsinni aallaavigaarput. Ullumikkut filmiliornissamut annerusumik periarfissaqartitsisoqanngilaq, periarfissaqartitsinissarlu inuiaqatigiit ataatsimoorluta annerusumik tapersersortussaagaluarparput, tassami inuiaqatigiit ikittuinnaavugut aamma inuit pilersitsinermik suliaqarniartut aningaasarsiorsinnaanerat killilerujussuuvoq.

– Aamma taamaappoq isiginnaartitsinerup, qalipagaliornerup, qiperuinerup allarpassuartigullu pilersitsiortornerup iluani. Isumaqarpunga piffissanngoraluartoq tamakku pimoorullugit oqallisiginissaat, aamma nuna namminersulerniartoq tamakkuninnga pinngitsuuisinnaanngilaq, tassami uagut immitsinnut qanoq paasisarnertinnut tamakku pingaaruteqarlutik tarrarsueqataapput, Julie oqarpoq.

– Suunuku pingaartikkivut? Inuiaqatigiittut allanut sanilliullugit suut salliutikkumavagut? Qanoq inuiassuarnit isigineqarumavugut? Eqqumiitsuliortut kulturilerisullu oqaluttuarisaanikkut takutippaat, inuiattut angusatsinnut pingaaruteqarlutik. Taakkuuppummi qasujuillutik kulturitta sikkerartuarnissaanut sukataarutillit. Tamatigut aningaasalersorneqanngikkaluarlutik piumassusertik aallaavigalugu suliaqartarlutik, meeqqaniit utoqqarnut, peqataatitsisarnermikkut aningaasanik kaaviiaartitseqataasarlutik. Tassaniipput piginnaasarpassuit inuit kulturillu akornanni sikkerartitsiinnaratik, aningaasanik kaaviiaartitsisut. Kulturimik ineriartortitsisut aningaasalersorluarsinnaasuugaanni, takornariartitsinermut avammullu inuiattut soqutiginaaterput pitsaanerusumik tuniniarsinnaagaluarparput, Julie Edel Hardenberg oqarpoq.

Ilanngullugu oqaatigaa nammineq eqqarsaatigisarlugu, eqqumiitsuliat oqallissaarisut oqaluttuarisaanitsinnullu pingaarutillit nunatsinni sumut takusarneqarsinnaanersut.

– Naak taanna eqqumiitsulianut katersugaasivik saqqummersitsivik kikkunnut tamanut; atuartunut, ilinniartunut, ilaqutariinnut takornarianullu oqaluttuarisaanitsinni pisunut tarrarsorfissarput, Julie aperivoq nangillunilu;

– Piffissanngunngila eqqumiitsuliat oqallisaarisut nunanit allanit katersorneqartinnagit ”angerlarsimaffittaartikkutsigit”, Julie aperivoq.

Ilanngullugu oqaatigaa nammineq maannakkut nunatta avataanit eqqumiitsulianik katersisartunit, Katersugaasivinniit assigisaaniillu, suliami pisiarineqarnissaanut isumaqatigiissuteqalernissamut qanillattulersimalluni, tassami eqqumiitsuliortut suliaat nunatsinni angerlarsimaffissaqartinneqanngillat.

Juliep naggasiullugu kaammattuutigaa, assassornikkut sanaaluttarnikkullu piginnaasallit ilinniarfissaqalersillugit pigaanni, qanoq ineriartortitseqataanermut sunniuteqaqataatigissagaluarnersut.

– Apeqqutit tamakku akissutissarsiniarlugit aallartittariaqarpugut, aamma inuiattut immitsinnut pingaartinnerunerput ersersittariaqalerparput.

 


Julie Edel Hardenbergip ukioq manna peqataaffissai suleqatissaalu:

– Oqaluffimmik pinnersaaneq. Ny Anstalt, Nuuk.
– Anamnese-Eqqaaqqiineq (inuit oqaluttuaaraat).
– “Inclusive Nation”, Cycle Music and Art Festival, Berlin.
– ”Tangible Extractions”- Anne Haaning, Roskilde Festival
– ”BIG ART”, Charlottenborg, København.
– Next Door Project.
– “Inclusive Nation”, Cycle Music and Art Festival, Paris. 2018 ”Le Soin des Possibles”, VNH Gallery

Tamakku saniatigut Danmarkimit filmmanuskriptiliortut peqatigalugit oqaluttuap imarisaanik ilusilersueqataassaaq. Julie suliassaaleqinani periarfissat arlaqartut itigartittariaqarsimavai. Kingullertigut itigartippaa Italiami Venedigimi saqqummersitseqataanissaraluaq, ”Time-Space-Existence”.

Aaqqissuisut

Nunarput pillugu sammisaqarfik