Anaanani sinnerlugu Røde Korsimut 75.000-nik tunissuteqartoq

Islandimioq Hrafn Jökulsson, anaanani toqukkut qimagussimasoq sinnerlugu, Tasiilami Røde Korsimut 75.000 koruuninik tunissuteqarpoq.

Hrafni Kangiani ilisarisimaneqarluarpoq, tassami ukiorpassuarni sumiiffimmi skakkerneq aaqqissuullugulu ingerlattarsimavaa, aamma nunatta Islandillu qaninnerusumik suleqatigiilernissaat sulissutigalugu Islandimi ilisarisimaneqarluarpoq.

johannaK
Hrafn Jökulssonip anaanaa, Jóhanna Kristjónsdóttir. Assi nammineq pigisaq.

Tunissut anaanaminut, siorna toqukkut qimagussimasumut, eqqaaniutitut tunniunneqartoq Hrafn Jökulssonip oqaatigaa. Hrafni Islandimi skakkertartut peqatigiiffianni, Hrokurinnimi siulittaasuuvoq, aamma Kalaallit Islandimiullu peqatigiiffianni, Kalak-mi ukiorpassuarni suleqataassimavoq.

Aningaasanik tunissuteqarneq Tasiilami Polar Pelagisk skak festivaleqarnerata nalaani pivoq, pisorlu Kalaallit Nunaanni ukiuni 15-ni aaqqissuussisarsimanernut malunnartitsiniarluni ingerlanneqarsimavoq.

– Anaanaga iliuuseqarniartuartuulluni inuusimavoq, nunallu hunnorujungajaat angalaffigisimavai. Naallu qasujuilluni Kalaallit Nunaanni meeqqat sullinniartuarsimagaluarlugit, nammineq Kalaallit Nunaat tikissimanngisaannarpaa, Hrafn Jökulsson oqarpoq.

– Suliniummut pingaarutilimmut tapersersuerusuinnarsimavunga. Inuppassuit Kalaallit Nunaata Kangiani pisoqartitsisarnermik ingerlataqarput, uangalu tamatumunnga tunniussaqarusussimavunga. Aamma suleqataarusuttut tamaasa suleqataaleqqullugit kajumissaarumavakka, Hrafni oqarpoq.

– Anaanaga nunarpassuarni meeqqanut ikiuiniarnermik ingerlataqartarsimavoq, soorlu Islandimi, Syriami, Yemenimi, Afrikami allanilu. Anersaava taamaalillunga Kalaallit Nunaannut ingerlateqqippara, Hrafn Jökulsson naggasiivoq.

 

Aaqqissuisut

Nunarput pillugu sammisaqarfik

%d bloggers like this: