Alcoap suliniutigisimasai allanut neqeroorutigineqassasut

Siverth K. Heilmann (A) juunip qulingiluaanni naalakkersuisunut apeqquteqarpoq, Kangerlussuup nunataani Tasersiap Tasersua iluaqutigalu nukissiorfiliorniarneq aamma Maniitsup qeqertaani aluminiumik Alcoap aatsitsiviliorniarnera Naalakkersuisunit suli pilersaarutigineqarnersoq.

Inuussutissarsiornermut Nukissiuutsinullu Naalakkersuisoq, Aqqalu Jerimiassen (A) akissuteqarpoq, Alcoa 2016-imi Naalakkersuisunut nalunaaruteqarsimasoq, suliniummik ingerlatseqqinnissaminut periarfissaqarani, tamannalu aluminiumik nioqquteqarfiup qanoq inissisimaneranik pissuteqartoq

Aamma atuaruk: Alcoa suli piva

– 2016-imi oktobarimi Naalakkersuisut aamma Alcoa ilassutitut isumaqatigiissuteqarput, ilassutitullu isumaqatigiissutaasoq periarfissaqartitsivoq Alcoap suliniutaanut maannamut immikkoortinneqarsimasut erngup nukinganik iluaquteqarluni pilersitsinissaq allanut avataaneersunut soqutiginarsarneqarsinnaasoq, Naalakkersuisullu taamatut iliorniarput, Aqqalu Jerimiassen akissummini allappoq.

Ilanngullugu naalakkersuisoq akissuteqarpoq, periarfissat pineqartut siunertanut allanut atorneqarsimassanngikkaluarpata, niuernikkut aluminiuliornermi pissutsit ajunngitsumik inissisimaleqqinneranni, taamalu nutaamik aatsitsiviliornissanut aningaasaliisoqarnissaanut periarfissaqalernermi, taava Alcoap soqutiginneqqilersinnaanera ilimagineqartoq.