Alcoap aatsitsiviisa ilaanni aluminiu naammassineqarsimalluni niuerutigisassaq. Assiliisoq: Alcoa

Alcoa suli piva

Kangerlussuup nunataani Tasersiap Tasersua iluaqutigalu nukissiorfiliorniarneq aamma Maniitsup qeqertaani aluminiumik ”Alcoap” aatsitsiviliorniarnera Naalakkersuisunit suli pilersaarutigineqarpa, Inatsisartunut ilaasortaq, Siverth K. Heilmann (A) § 37 aqqutigalugu Naalakkersuisunut apeqquteqarpoq.

Atassut nammineq maanna Inuussutissarsiornermut Nukissiuutsinullu Naalakkersuisoqarfimmik akisussaalluni tigumminnippoq, tassani Aqqalu Jerimiassen (A) naalakkersuisutut inissisimammat.

Siverth K. Heilmann. Assiliisoq: Namminersorlutik Oqartussat

– Aluminiumik aatsitsiviliornissaq, nunatsinni avataaniit aningaasaliinerit eqqarsaatigalugit annersaasussaq, 15 milliardit koruunillu sinnerlugit missingersuusiorneqarsimasoq unitsikkallarneqarnikuuvoq, aamma naak innuttaasut amerlanerussuteqarluartut tapersersuigaluartut, Siverth K. Heilmann tunngavilersuivoq.

– Pilersaarut sanaartornerup nalaaniinnaq 3 – 5 tusindinik sulisoqartussaavoq, aatsitsivissarlu naammassiguni ukiut 70 – 100 tikillugit suliffiit aningaasarsiorfissarpassuillu pilersittussaavai. Taamaattumik pisariaqartipparput, Inatsisartuni suliffissanik aningaasarsiorfissanillu ataavartunik pilersitsinissamik oqaluinnarata, avataaniit aningaasaleerusuttut pinngortitallu nukinganik iluaquteqarneq atorlugu pilersitsiniartut ikioqatigiiffigissallutigik, Siverth K. Heilmann allappoq.

– Politikikkut piluusaarnerup akimmiffissalersuinerullu kingunerisaanik pilersaarut taamaatsinneqarallarnikuusoq aallarteqqinneqartariaqarpoq, Siverth K. Heilmann apeqquteqaammini allappoq.

Naalakkersuisunut ilaasortaq, Aqqalu Jerimiassen (A), kingusinnerpaamik sapaatip-akunnerata tulliani akissuteqartussaavoq.

Aaqqissuisut

Nunarput pillugu sammisaqarfik