Akissarsiaqarluarlutit ilinniartitsisunngorniarit – saamisut

Ilinniartitsisussaaleqineq pissutigalugu saamit oqaasiisa ilaat atorunnaarneqariartuinnarput. Tamanna immikkut ilinniartitsisunngorniarfik aqqutigalugu aamma akissaateqartitsilluarnikkut iliuuseqarfigineqassaaq. Taamak NRK Sápmi allappoq.

Lulesaamisut aamma sørsaamisut oqaluttut inuit 4.000-it missaaniipput. Lulesamisut oqaasillit 1.500-t Sverigemi najugaqarput aamma 500-t Norgemi. Nalinginnarmillu ilinniartitsisunngorniarneq aqqutigalugu lulesaamit sørsaamillu oqaasiinut sammitillugu ilinniartitsisunngortoqarsinnaanngilaq. Ullumikkut meeqqat atuarfiini lulesaamisut ilinniartitsisut taamaallaat arfiniliupput, atuartullu 118-it atuarfinnut arfineq-sisamanut agguarneqarsimapput.

Robin Paulsen (assi, aaqq.) qangali ilinniartitsisunngorumalluni aalajangersimavoq, aamma siorna nalinginnarmik ilinniartitsisunngorniarfimmi aallartippoq.

– Lulesaamit oqaasii oqaatsima aappaatut meeqqat atuarfianni atortuartarsimavakka aamma ilinniartitsissutigerusuppakka, Robin Paulsen oqarpoq. Taanna sianerfigineqarpoq.

Norgep avannaani naalagaaffiup sinniisaa, Kevin Johansen, Robinimut neqeroorutissaqarluni sianerpoq; lulesaamit oqaasiinik ilinniartitsisunngorumasut pitsaasumik atugassaqartinneqarsinnaapput.

– Massakkut iliuuseqartoqalinngippat atuartut lulesaamisut oqaluttut naammattumik ilinniartinneqarnavianngillat. Piffissaarutilerpugullu, Kevin Johansen NRK-mut oqarpoq. Ilutigisaanik pilersaarutinik saqqummiussivoq:

Ukiumut akileraarutaasussaanngitsut 200.000 koruunit lulesaamisut sørsaamisullu ilinniartitsisunngornianut akissarsiaritinneqassapput. Killormut neriorsuissapput sivikinnerpaamik ukiuni pingasuni saamisut ilinniartitsissallutik.

Qinnuteqarfissaq apriilip 15-anut killilerneqarsimavoq. Piffissamilu kingullermi ilinniartunngorsinnaasutut naatsorsuutigineqartut Johansenip sianerfigisarsimavai.

– Qinnuteqaatit amerlanerusut takorusussimagaluarpavut. Maannamut pisariaqartitsineq angummaffigineqarnavianngilaq. Kisianni aallartinneruvoq, Kevin Johansen oqarpoq.

Robin Paulsenilu qinnuteqartut ilagaat.

– Suliniut ajunngilluinnarpoq. Saamisut ilinniartitsisut taamatut amerlisinneqassapput, Robin Paulsen oqarpoq.

___
Assiliisoq: Simon Piera Paulsen.

 

 

Aaqqissuisut

Nunarput pillugu sammisaqarfik

%d bloggers like this: