Tuttut umimmaallu piniarnissaat

Ukioq manna aasaanerani ukiaaneranilu tuttutassiissutit umimmattassiisutillu piniarneqarnissaannut piffissalersuisoqarsimasoq Namminersorlutik Oqartussat ilisimatitsipput.

– Piniarfigineqartartut amerlanerpaartaanni tuttunik umimmannillu ukiuni arlaqalersuni kisitsisoqarsimanngimmat, aammali pisat nalunaarutigineqartarneri amigarpallaartaqimmata, Aalisarnermut, Piniarnermut Nunalerinermullu Naalakkersuisoqarfik aalajangerpoq tuttut umimmaallu amerlassusiisa ikileriarnissaannut aarlerinanngitsumik mianersortumillu pisaassiissalluni, NO allappoq.

Tuttut

  1. Piniarfinnut tamanut tunngasoq: Inuussutissarsiutigalugu tuttunniarneq aggustip aallaqqaataanni aallartissaaq, oktobarip 15-iat ilanngullugu tuttunniartoqassalluni.
  2. Piniarfinnut tamanut tunngasoq: Sunngiffimmi tuttunniarneq aggustip aallaqqaataanni aallartissaaq septembarip 30-at ilanngullugu tuttunniartoqassalluni. Aqutsiveqarfimmi Nuummi sunngiffimmi piniartumut piniarfimmut ataatsimut akuersissummik ataasiinnarmik tunniussisoqassaaq. Akuersissut ataaseq Piniarfik 3-mut aamma akuersissut ataaseq Piniarfimmut 4-mut imaluunniit 5-imut tunniunneqassaaq. Ataatsimik akuersissuteqartoq tallimanik tuttussinnaavoq.
  3. Piniarfik 9 aamma 10 (Kangerluarsorujuk, Nuna Prudhoe kiisalu Nuna Inglefield): Inuussutissarsiutigalugu aamma sunngiffimmi tuttunniarneq aggustip aallaqqaataanni aallartissaaq, decembarip 31-at ilanngullugu tuttunniartoqassalluni.

2017-imi akuersissutit 1.022-t tunniunneqarput, 516-it Piniarfimmut Akia-Maniitsoq tunniunneqarlutik aamma 506-it Piniarfimmut Ameralik tunniunneqarlutik.

Akuersissummik tunineqarsimasut taamaallaat 491-it pisaminnik nalunaaruteqarput; 48 procentiullutik. Taamaammat Pinngortitaleriffiup aamma Aalisarnermut, Piniarnermut Nunalerinermullu Naalakkersuisoqarfiup nalileruminaatsittorujussuaat piniarfinni pineqartuni tuttut qanoq amerlatiginersut paaseqqissaassallugit.

Umimmaat

  1. Aqutsiveqarfik Maniitsoq: Piniarfik 1-imi aamma Piniarfik 3-mi inuussutissarsiutigalugu sunngiffimmilu piniartut aggustip aallaqqaataanniit oktobarip 15-iat ilanngullugu umimmanniarsinnaapput. Kulavaat norrallit aamma tiggaat tammajuitsussarsiniartunut atugassat piniaqqusaanngillat.
  2. Aqutsiveqarfik Sisimiut: Inuussutissarsiutigalugu aamma sunngiffimmi piniartut aggustip aallaqqaataanniit oktobarip 15-iat ilanngullugu umimmannik 400-nik piniarsinnaapput. Kulavaat norrallit aamma tiggaat tammajuitsussarsiniartunut atugassat piniaqqusaanngillat.
  3. Aqutsiveqarfik Qaanaaq: Piniarfimmi Kangaarsummi inuussutissarsiutigalugu sunngiffimmilu piniartut 40-nik umimmanniarsinnaapput. Piniarfimmi Nuna Inglefield aamma Nuna Prudhoemi inuussutissarsiutigalugu sunngiffimmilu piniartunut umimmattassiissutit allannguuteqaratik 60-iupput. Tiggaat tammajuitsussarsiniartunut atugassat piniaqqusaanngillat.
  4. Aqutsiveqarfik Ivittuut: Inuussutissarsiutigalugu aamma sunngiffimmi piniartut aggustip aallaqqaataanniit decembarip 15-iat ilanngullugu umimmanniarsinnaapput. Umimmannik 2018-imi apriilimi kisitsinermi ikinnerpaaffiliineq tunngavigalugu umimmannik 40-nik pisassiisoqassasoq aalajangerneqarpoq, umimmaat 1-2-nik ukiullit, angutivissat 16-it arnavissallu 24-t pisassiissutigineqarlutik.
  5. Aqutsiveqarfik Sigguk: Umimmaat 2016-imi 2017-imilu pisassiissutigineqartut amerlaqataannik piniartoqarsinnaasoq aalajangerneqarpoq, 150-it piniarneqarsinnaallutik. Tiggaat tammajuitsussarsiniartunut atugassat piniaqqusaanngillat.

Nuna Inglefield umimmanniarfigineqartartoq ilaneqarpoq kujataani nuna Nuna Prudhoe 2017-imi ilanngullugu umimmanniarfigineqarsinnaalerluni, umimmaat amaroqarnera pissutigalu kujavartertalermata.

Siggummi inuussutissarsiutigalugu sunngiffimmilu piniartut umimmattassaat allannguuteqaratik 150-iupput, taakku 2016-imi tusarniaareernerup kingorna aalajangerneqarlutik. Piniarfimmi tassani umimmannik ikinnerpaaffiliilluni kisitsisoqartinnagu pisassiissutigineqartut ilaneqassanngillat.

Erseqqissaassutigineqassaaq qamuteralaat, ATV-t aamma qamutit motoorillit allat tuttunut umimmannullu malersuutsitut atorneqarnissaat piniutiginissaallu inerteqqutaammata. Umimmannik qamuteralaat, ATV-t aamma helikopterit atorlugit APNN-imit akuersissummik pisimatilluni ungoorisoqarsinnaavoq.

Sunngiffimmi piniarnermut allagartap 2018-imi maajip aallaqqaataa sioqqullugu akilereersimanissaa pillugu piumasaqaat atuuppoq.

Ilanngussaq uani takuneqarsinnaavoq: http://naalakkersuisut.gl/~/media/Nanoq/Files/Attached%20Files/Fiskeri_Fangst_Landbrug/GL/Tuttut%20aamma%20Umimmaat_2018_Ilanngussat.pdf

Paasissutissat sukumiinerusut uku aqqutigalugit pissarsiarineqarsinnaapput: Oqa. +299 34 53 45 email: numl@nanoq.gl.

Aaqqissuisut

Nunarput pillugu sammisaqarfik